Kuriam žemaitiškai

Nors sakoma: savam krašte pranašu nebūsi, bet vis tik norisi tikėti, kad tai tik mitas.... Noriu pristatyti jums savo kūrybą. Kadangi tarmių metai – tai tarmišką.

Kiaura dėina lašnuo
Kiaura dėina lašnuo ėš atvėposiū palūpiū debesū
Rūtis, padkava jiedosės, vės dar negal pasėsuotintė.
Ruoduos perkous ė kaulus, ė pašalius šlumpontius. Tebeso
Mėsliem sava pri avėliū, katrūs ožgolė rītmetē soudėni.

Kor dar skalsoma gelsva lašnuo net ont sotemū nertėnė.
Ruodas kontrē dūzgen(pruocē pajiemė vėršo) kamanės.
Sekma dėina nu paopiū net ė nelaukta, nevertinta —
Parēt pėiva mėnotū procesėjė. Pondėivs tēp bus ožmanės.

Ka sostuotom net mėslės, vuo retius užluopītom — rītdėina
Nuors be āma. Tik žvilgius kavuodamas būtē i kliebi.
Dongaus soluos uzbuona pri slėnkstė palėkusės sklėdėna
Tuols be teisės sogrīžtė, nuors ė truopnē laikītom apgliebės.

Tikā laš kiaura dėina ėš atvėposiū palūpiū debesū.
Viejė pėrštā sogrobė nebgruo longinīčiuom, tik — rūtis
Ruoduos perkous ė kaulus, ė pašalius šlumpontius. Tebeso
Mėsliem sava pri avėliū, katrūs ožgolė rodėnėis liūtis...

Renata Kuršytė 2013

Žalvarė krīžēlis
Nukalės rodou žalvarė krīžēli
Krapīla debesėis pašvėntėna par soma.
Šnabžden rožončiū kontrē laukā žali
I pėlnatėis lašnuojonti skalsoma.

I žvaizdiū mielsva skombesi, i nakti
Kor svėrtis laimėn vėnčiavuonė smėlgū.
Skleinīčiuo — pruociaus bėtiū tor ožtektė
Kuol mes šešoulē kārtas. Nebožėlgo

Suopies priš viejė etont mėslės, piedas
Nebus tam gāla. Tiktā — ētė, ētė.
Nukalės žalvarė krīželi siedas
Pri slėnkstė rodou.
Krēstė dognė — retē...

Nukalės rodou žalvarė krīželi
Pri slėnkstė diejė — nenešies pro šali

Renata Kuršytė 2013
Nu čia — lig Tėn
Nugėrksnuojė i sotemas
Gerviū vėrtėnė. Stobuo — atviesa.
Apėnt gruo longinīčiuom
Pėrštā šakšėnė mielsvi, kaulieti.
Natės rodėnėis vīzdē
Šermokšnēs i pakelės soudėnas
Išlašnuos magarīčiuom
(Je kas abejuotė ėšdrīstom).
Kumet virptiuos lėktarnuom
Prisėrpusės naktīs ė — lieti
Žingsnē varganuos būtėis
Sostuos degont Vieliniū ogni.
Nugėrksnuojusi vėrtėnė
Lėipta ėš suopuliū nutėis
Nu čia — lig Tėn par rodėnėis
Žalvariu kluota bedognė...

Renata Kuršytė  2013

I mielsva pėlnėjuos smūtkeli
I Tėn, ėš kor nevalno grīžtė
Nuors ė trumpam atsklėistė sklousti,
Tėis ronkas lapkritis. Gaidgīstie —
Mėgėn šalnuojėmās ikoustė.
I surombiejusės, nu čiesa
Apējusės mazuolēs vuotis.
Skleinīčiuo bėng erbeta viestė
Ė nebrēk žuodiū keravuotėis
Katrėi, ruods, netīčiuom ėšsprūda
I švėnta pėlnėjuos smūtkeli.
Palėkė (padiou) skalsi grūda
Torielkas skreitė — asluo kelės
Žegnuojas nezgrenbā sekundės.
I Tėn, ėš kor nevalno grīžtė,
Išēsem — vėsi. Nesėskundė
Ka ronkuos vėrp lėkėma rīkštė.
I mielsva pėlnėjuos smūtkeli —
Trop keravuoti žuodē keli ...

Renata Kuršytė 2013

Pro kūlius
Atuodūsēs ėš vākara,
Lėkėma plātė kliebė.
Pro kūlius pėlkus, stagarās,
Kor šimtmetē apgliebė.
Takalēs parēt vieliniem
Pro paraisti, opāli
Dūšēlės — pasivielinė,
Grabnīčės deg sošālė
Raukšlietās pėrštās agierā.
Žvaizdēlės — dongaus longė,
Dėivaliau brongus, kāp gerā,
Apėnt briekšmuo aplonkė!
Kor čiesa žingsnē pri stobuos
Mieroun šešoulė ilgi.
Palaukiem dailē, ba skobuos,
Jopeliem apsėvėlkė
Brend dėinas tėn ėš vākara.
Lėkėma plātė kliebė.
Kor Aniuols pri ogniakora
Bod rodėni apgliebės.

Renata Kuršytė 2013